Wikipediaren arabera, akademia goi mailako irakaskuntza eta ikerketa egiten duen erakunde eta pertsona adituen multzoari deritzo. Duela 2400 urte Platonek Atenasen Akademia deituriko eskola filosofikoa sortu zuenetik, gauzak dezente aldatu dira unibertsitate-munduan gabiltzanontzat. Hasi aurretik, nire esperientziak biomedikuntza-biologia molekularraren arlokoak direla esango dizuet, ez dakit beste adarretako ikerlariak salbatzen zareten.

Esan izan dugu zientziaren helburuetako bat Natura eta bizi garen mundua hobeto ulertzea dela. Hala ere, sarritan ikerketa zientifikoek nahastea sortzen dute, edo uste okerrak. Metodo zientifikotik urruti dauden prozedurak jarraitu direlako, edo une horretan eskuragarri zeuden tresnekin informazio guztia ezagutzea ezinezkoa zelako, ez dugu ahaztu behar «ikerketa baten emaitzak dio» esaldiaren ostean zuzena ez den zerbait etor daitekeela.