Istorio luzea du atzean Zizurkilgo Aranburu Oilotegiak. Hirugarren belaunaldiak hartu du bertako ardura, eta garai berrietara egokitzen ari dira, betiko esentziari bizkar eman gabe; Instagram eta Facebook orriak sortu dituzte aurten, «gure egunerokoa eta mundua ikusteko modua kontatu nahi ditugulako».

Andoainen bada baserri bat, bertako hormak negar malkoz margotuak direna; bertan 6 eta 12 urte bitarteko neskentzako espetxea bilakatu zen, 1949. urtetik aurrera. Tuberkulosia ekiditeko egoitza bezala saltzen zuten falangistek, baina hau, berriz ere, erregimenaren falazia bat izan zen. Komunista errepublikanoen alabak eramaten ziren bertara.