Tolosaldeko hainbat hautagairekin batera, herriko gune garrantzitsuenen bisita egin du, gaur, Markel Olano hautagaiak. Bisita hasi aurretik, ordea, Plaza Zaharra izan du euskarari eta gazteriari begirako proposamenak aurkezteko gune.
Euskarak aurrerapausoak kalean eman behar dituela uste du Olanok, izan ere, "jakitetik erabiltzera pasatu behar dute gazteek" bere ustez. Horrela, eskolako jakintzaren ondorioz kaleko erabilera ere orokortzea "oso konplexua" dela baieztatu du.
"Dena den, proposamen zehatz batekin gatoz horretara iritsi ahal izateko", azaldu du: "Gazteen kultura eta aisiarako edukietan, gehiena gaztelerazkoa da, eta eduki horietan eragin behar da". Helmuga horretara iristeko, jeltzaleek Tabakalera gune estrategikotzat jo dute, eta "euskarazko ikus-entzunezkoak sortzeko fabrika bat izan behar du" haien ustez: "Gipuzkoako Foru Aldundiak ez luke bere esku soilik izango hori, eta gazteekin batera egin beharko luke lan". Horrenbestez, "konpromiso" hori nabarmendu du Ahaldun nagusi izateko hautagaiak: "Gazteek kontsumitzen duela, komunikabideak eta sare sozialak, euskarazkoak bilakatzea da gure eginkizuna".
Euskararen normalizazio bideak jorratzerakoan, ezker abertzalearentzat ere hitzak izan ditu Olanok: "Gure ustez euskara normalizazioak ez du erakundeetatik inposatua izan behar, gizarteak izan behar du, horretan, protagonismo nagusia. Ezker abertzalea, ordea, aurkakoa egiten ari da".
