Nagusiki lau konpromiso nagusi hartu ditu EAJk: gertutasuna, gardentasuna, entzute aktiboa eta kudeaketa eraginkorra. Izan ere, Peonen esanetan, "udala da herritarrengana urbildu behar duena, herritarrak udal politikan inplikatzeko".
Bide horretan, komunikazio bide berriak jorratu nahi ditu alderdi jeltzaleak: "parte hartze eredua guretzat ez dira herri asanbladak. Gure ustez parte hartzeak benetakoa, landua eta batez ere, jarraitua izan behar du".
Komunikazio horrek, "konfidantzan" oinarritua egon behar duela azaldu du Peonek, eta horretarako, "datu publikoak jendearen eskura jarri, zeharkakotasuna landu, eta burokrazia arindu" behar direla esan du: "administrazio eskuragarriago bat behar dela pentsatzen dugu, tolosarrei arreta hobeto eman ahal izateko, politika publikoak balio publikoa izan dezan".
Amaitzeko, "portaera etikoak" izango dituztela nabarmendu du, bai kontratazioetan, baita kudeaketa publikoaren edozein eremutan ere. Gainera, publiko eta pribatuaren arteko lankidetzan sinergiak bilatzea "derrigorrezkoa" dela esan du.
