Gizarte ongizatearen esparrurako proposamenak plazaratu ditu, gaur, Tolosako Eusko Alderdi Jeltzaleak. Olatz Peon alkategaiak beren alderdiaren "ikuspegi humanista" nabarmendu du, eta "pertsonekiko konpromisoa" dutela azaldu: "Baztertuta dauden sektoreei babesa eskaintzea beti izan da gure ardatzetako bat".
Bide horretan, gizartea aldatzen ari dela ohartarazi dute eta, beraz, "gizarte-laguntzek ere aldaketa bat behar dutela". Horri erantzuteko, lehenik, erakundeek norbanako eta eragileekin sortu beharreko elkarlana azpimarratu dute eta, era berean, lau lan-ildo nagusi proposatu ditu EAJk.
Batetik, Tolosako errealitatearen diagnostikoa egiteko asmoa azaldu dute eta, behin errealitatearen argazki hori aterata, "erakundeen arteko koordinazio eta lankidetza sustatzea lehentasun izango da".
Hirugarren adinari begira, berriz, "pertsonak beren etxean ahalik eta denbora gehien egon ahal izateko neurriak" hartuko dituztela jakinarazi du Peonek, "horretarako formulak hobetuz".
Azkenik, gizarte-janleku gehiago sortzeko beharraz ere ohartarazi dute jeltzaleek.
