Peñagarikanok eta gero, Sortuko Joseba Permachek hitz egin zuen. Permachek EH Bildu bozkatzea oso garrantzitsua dela esan zuen, horrela bakarrik eraldatu ahal izango da eta, egoera politikoa. "Politika egiteko beste modu bat dagoela utzi dugu agerian, eta bide horretan jarraituko dugu", esan zuen. Iheslari eta euskal presoak etxeratzeko beharraz ere hitz egin zuen, eta Euskal Bidea gogora ekarri. Era berean, datozen lau urteetan erabakitzeko eskubidea zentroan jarri behar dela esan zuen, "gure jardueraren oinarria izango da" esan zuen. "Gainontzeko alderdiek, baita EAJk ere, EH Bildu instituzioetatik bota behar dela esaten dute konplexurik gabe, baina ez dute lortuko. Politika egiteko beste modu bat dagoela erakutsi dugu, Gipuzkoako Foru Aldundiak egin duen lana ikustea besterik ez dago, eta ez dute hori nahi", esan zuen.
Ondoren, alkategaiak, Mikel Agirrezabalak, hartu zuen hitza taldea aurkeztu eta datozen lau urteetarako prestatu dituzten lan ildo nagusien berri emateko. Agirrezabalak herritarren parte hartzea sustatzen jarraituko dutela esan zuen, hori izango dela Ibarrako EH Bilduren ardatz nagusia; "herria erdigunean jarriko dugu". Talde lana egingo dutela nabarmendu zuen, eta talde lana eta parte hartzea sustatzeko azken lau urteetan asko ikasi dutela eta bide horretatik jarraituko dutela esan zuen.
Ekitaldia Sendi Ekintzan bukatu zuten, barrikotea eginaz.
