Txalapartarekin hasi dute ekitaldia Amasa-Villabonan. Herritar ugari gerturatu da bertara, eta lehenik orain arte udalean egon diren Bilduko hautetsiei omenaldia egin diete; egindako lana eskertuz.
Gipuzkoako Foru Aldundirako hautagaia den Ainhoa Beola ere Villabonan zegoen, eta bertaratuei hitz egiteko aukera izan du. Beolak diputazioan egindako lanaren errepasoa egin du, eta gobernatzeko modu berria aldarrikatu du, azken lau urteotan egindakoaren bidetik.
Ondoren etorri da hauteskunde hauetan EH Bilduren zerrenda osatzen duten herritarren txanda. Herri programaren puntuak azaltzearekin batera, herritarren artean egindako programa dela aldarrikatu dute. Hitz egiten azkena Nora Urbizu izan da, eta programa betetzeko konpromisoa hartu du alkategaiak.
Guztiek etxetik urrun daudenak gogoratu dituzte, eta Nora Urbizuk, euskal presoak ikustera joandako herritarrak ere gogoan izan ditu. Azkenik, ekitaldian EH Bilduren aldeko botoa eskatu dute partaideek.
