Ainhoa Artolazabal Kilometroetako garbiketa arduradunak azaldu duenez, San Estebangoa izan da zikinen geratu den gunea, "azken kontzertua bertan izan zen. 19:15 inguruan amaitu zen, eta narrats samar geratu zen egia esan. San Blasen ere, Vendettarekin, gunea zikina geratu zen, baina 14:45ak ziren, eta iluntzera arte denbora izan genuen belazea txukuntzeko".
DBHko lehen mailatik hasita, batxilergora bitarteko ikasle guztiekin antolatu dute garbiketa. "Mailaz maila antolatu ditugu neska-mutilak, guneetan barrena. Hori bai, San Estebango gunea Gatiburen kontzertuaren ondoren nola geratu zen ikusita, hemengo zabor bilketarako jende gehiago elkartzea erabaki dugu", zehatu du Artolazabalek. Gaztetxoenak ikastola inguruan geratu dira; DBH4koak, berriz, San Blasera joan dira, eta Batxilergoko ikasleak San Estebanen izan dira.
Bildutako hondakin kopurua aurreikusitakoa izan dela esan du Artolazabalek: "Gazte gehien bildu zen tokietan zikinkeria gehien topatzea espero genuen, eta halaxe izan da. Lasaiagoak ziren gunean, berriz, askoz ere garbiago geratu ziren. Esperotakoa bete da, beraz".
Hasiera batean goizeko lana izango dute garbiketarena, batxilergoko ikasleek ez baitute klaserik arratsaldean. "Astelehen goizeko lana, beraz, gunea garbitzea izango da. DBHko ikasleak, berriz, klasera joango dira arratsaldean", gaineratu du garbiketa arduradunak.
