Herrialde Katalanetako herritarren bisita izango dute asteburuan Onddo Gazte Asanbladako kideek. «Aiztondoko Elkartasun Egunera etortzen zen Blanesko (Herrialde Katalanak) familia bat, eta asanbladako kide batzuk harremana egin genuen beraiekin», azaldu du Andoni Ugarte asanbladako kide batek. Irailean, Katalunian izan ziren, eta orain beraiek etorriko dira.
Ostiral iluntzean ailegatuko dira Kataluniako gazteak, eta ongietorria eman ondoren, trikipoteoa egingo dute. Gaztetxean afaldu eta gero, DrMarti kataluniarren kontzertua izango da. Larunbat goizean, tailerra egingo dute: «Emakumeek espazio autogestionatuetan dituzten rolak aztertuko ditugu», azaldu du Ugartek. Babarrun jatea egingo dute eta arratsaldean mahaingurua egingo dute: «Gazte mugimendu bakoitzaren bizipenak, borrokak elkarbanatuko ditugu». Egunaren amaieran, trikipoteoa egingo dute, festa giroa luzatzeko.
Hitzaldia, Alegiako gaztetxean
Altsasukoak aske, muntaia polizialik ez lelopean, hitzaldia eskainiko dute Altsasuko herritarrek 19:00etan, Alegiako gaztetxean.