Bigarren aldia izango da txapelketan parte hartzen duela. «Ezagutzera emateko erakusleiho ona» dela dio, «eta nahiz eta ni bereziki ez nagoen lehiarako oso zentratuta, kantatu nahiko nuke eta kantatzeko une horretan oso jende ona dagoenez, agertu egin behar duzu, eta txapelketa agertzeko bide bat izan daiteke». Duela lau urte «asko uste gabe» pasa zuen lehenengo fasea eta aurten ere gustatuko litzaioke: «Aurten galbahe hori estuago dago; %60 kalera doaz edo goaz, eta gustatuko litzaidake pasatzea. Erronka dezente potoloagoa da».
Etxeko lan gutxi egin duela dio, prestaketei buruz galdetzean. «Elkarrekin artean geratzen garenean kantatuz prestatu naiz, eta hori da aproposena. Lagun artean geratzen gara, hasi gara beste bertso eskolakoekin, jende ezberdina elkartzeko, eta astero-astero, ni behintzat astean behin saiatu naiz, elkartzen abesteko».
Egun ona badu, denetan eroso aritzen dela dio, bai bakarka edo binaka, gogoz aritzen delako. «Orain dela lau urte Iparragirre zen benetan blokeatzen ninduen ariketa bat. Garbi nuen oraingoan hori gainditu nahi nuela, eta momentuz askoz erosoago iritsiko naiz. Ez daukat ariketa bat bereziki kezkatzen nauena».
Faboritoen inguruan galdetzean, eta «betikoak mapatik kenduta», puntan ibiliko dira «Unai Agirre, Alaia Martin, Beñat Gaztelumendi... Eta Irazu auskalo. Izen horiek hor izango dira».
