Espero bezala Antaliseko langileek jaso dituzte kaleratze gutunak. Baten bat falta bada ere, gehienek jaso dituzte gutunak. Kaleratzeak otsailaren 14ko datarekin iritsi zaizkie, baina langileak borrokan jarraitzeko asmoa azaldu dute.
Batetik, protestekin jarraituko dute, eta bestetik, Gipuzkoako Foru Aldundiarekin eta Tolosaldea Garatzenekin batera egiten ari diren bideragarritasun plana garatzen jarraituko dute. Hurrengo bilera etzi izango da, osteguna, 16:00etan, Lehiberrin, eta bideragarritasun planak arrakasta izango duen edo ez jakiteko, enpresaren jarrera ezagutu zain daude. Izan ere, enpresak, hasieran, langileei laguntza emateko prest azaldu zen, hauek enpresa bere gain hartzeko, baina baldintza batekin, langileek itxiera sinatzea. Langileek ordea ez zuten baldintza onartu, eta beraz, orain ez dakite berriz ere laguntza emateko prest egongo den.
Era beran, epaitegien bideari ekingo diote kaleratzeak direla eta, eta orain sindikatu eta langileen guztia aztertzen eta prestatzen ari dira.
