Antalis enpresako langile ordezkaritzak azaldu duenez, urtarrilaren 9a arte luzatu dute enpresa eta lan ordezkarien arteko kontsulta epea. Berez, atzo zen bukatzekoa epe hori, baina denen artean irtenbideak bilatu asmoz, zabaltzea erabaki dute.
Erabakia asteartean Lan Ikuskaritzarekin izandako bileraren ondotik etorri da. Bilkuran ikuskariak langileen ordezkariek emandako azalpenak aintzat hartu zituen ELA sindikatutik azaldu dutenez eta "beste bideak arakatzea eta enpresa Eusko Jaurlaritzako Industria Sailarekin harremanetan jartzera behartu zuen, langile ordezkarien laguntzarekin", esan dute.
Zuzendaritzak langileei enpresa ixteko erabakia jakinarazi zienetik, enpresa komiteak hainbat bilera egin ditu zuzendaritzarekin. "Denak leku ezberdinetan izan dira, eta azken momentuan ere bilerak lekuz aldatu dizkigute, langileei beren lanpostuen alde borroka egitea oztopatuz", esan du sindikatuak. "Enpresan bertan ez dute negoziatu nahi, ez direlako eroso sentitzen", gaineratu du.
Langileek ordea argi dutela diote: "Itxiera azken bidea da eta ahal den guztia egin behar du zuzendaritzak enpresa irekita mantentzeko". Bidea "luzea eta gogorra" dela badakite ordea, eta itxieraeren mehatxua gainean dutela, "baina gure lanpostuen alde borrokan jarraitzen dugu eta jarraituko dugu", azaldu dute.
