Musika jaialdi onenek izaten dituzten osagaiak izan ditu gaurko Errockmeria jaialdiak: talde bikainak, musika ona, publiko zoragarria, gune paregabea eta efektu bereziak. Eguerdiko 12:00etan eman diote hasiera jaialdiari eta behe-lainoaren efektu berezi naturala lagun zutela, arratsaldea arte musika taldeez gozatzeko aukera izan dute bertaratutakoek.
Amasa-Villabonako Beertoki elkarteak bigarrenez antolatu du jaialdia Zelatunen, tradiziozko leku hori aprobetxatu eta beste musika bat eramatea izan da nahi izan dutena. Eguraldia nahiko aldakorra bazen ere, asko izan dira bertara gerturatu eta familian edo lagunartean Errockmeria jaialdiaz gozatzeko hautua egin dutenak. Asko gainera, jaialdia hasi aurretik, Hernioko gurutzera ere igo dira.