Irurako ikastolak Ñañarri rallysprinta antolatzeari uko egin ostean kolokan zegoen lasterketa honen jarraipena, baina azkenean Enirio-Aralar Mankomunitateak hartu du ardura. Mankomunitateak ohar batean azaldu duenez, datorren osoko bilkuran sinatuko dute akordioa rallyaren arduradunekin. Eniriotik Igaratza arteko oinezkoen bidea ibilgailuentzat egokitzea adostu zuten azken bilkuran eta bide horretan egingo dute, hain justu, rallya.
Pistaren lanek hainbat fase izango dituzte, lau urtetarako proiektua da, baina lehen fasea datozen hilabeteetan gauzatuko dute, lasterketa egiteko aukera emanaz. Lasterketa, hortaz, datorren urtean egingo dute eta data aurrerago zehaztuko dutela azaldu du mankomunitateak.
Rallyak ikusleak galdu ditu azken urteetan eta erabaki honekin lasterketari beste bultzada bat eman nahi diotela esan dute. «Aralarrek eskaintzen dituen paraje ederrek ere ikusleak erakarriko dituelakoan gaude», adierazi dute oharrean.