Tolosa F.C elkarteak eta Gipuzkoako Pilota Federazioak antolatu dute eguna Tolosako Udalaren laguntzarekin. Aurreikusi bezala burutu zen egitaraua eta ondo bete ziren jarritako ordutegiak eta gainerakoak.
Txapelketa Herrikoi azkarra goizetik arratsaldera
Goizeko 10:00eta hasi ziren Beotibar pilotalekuan Txapelketa herrikoiaren lehen partidak, eta etenik gabe aritu ziren finala jokatu behar zutenak geratu arte. Hamar minutu pasatzean amaitutzat ematen zen partida bakoitza eta tanto gehien egin zituen bikotea igarotzen zen hurrengo errondara. Arratsaldean jokatu zen finala ia sei orduko pilota saioa eta gero. Finala Ainara Azpiazu eta Josune Urruzola hernaniarren eta Amaia Vicario eta Ane Arregi donostiarren artekoa izan zen. Azken hauek irabazi zuten hamar minutuko saioa, 12 eta 4.
Bigarren mailakoen finala Rodas-Arrillagarentzat
Rodas berrobitarra eta Arrillaga zubietarra aritu ziren gorriz, eta urdinez Otaegi donostiarra eta Erasun zizurkildarra. Bi atzelarien arteko norgehiagoka gogorra iragartzen zen, eta parekotasun handia aurreko koadroetan. Ondorioz, partida estua ikusiko zela uste zen. Ez zen horrelakorik gertatu. Arrillaga zubietarrak sekulako erakustaldia egin zuen, pilota bizi eta luze mugituz eta egindako zuloak bikain aprobetxatuz tantoa amaitzeko. Berak agindu zuen ia partida osoan, oso aukera gutxi emanez aurkariei, eta beren senetik ateraraztea lortu zuen bolada batean. Nabarmendu behar da Rodas berrobiarrak egin zuen lana ere: behartu zutenean zein zango arinak dituen erakutsi zuen eta ez zuen ia pilotarik galdu; tanto politak ere egin zituen. Itxaso Erasun izan zen, behar bada, bere maila eman ezinean ibili zena; jakina da, ordea, aurkaria bolada onean eta dena nahi bezala atertzen zaiola ari denean zaila dela aurre egitea. 30 eta 16 irabazi zuten Rodas-Arrillagak, eta ondo islatu zuen markagailuak frontoian ikusi zena.
Fina nagusia, borrokatua eta ikusgarria, Otaegi-Mendizabalentzat
Otaegi-Mendizabal, asteasuarra eta anoetarra hurrenez hurren, eta Garmendia-Eizmendi alegiarra eta aiarra izan ziren aurrez aurre lehen mailako finalean. Sailkapeneko ligaxkan ikusitakoa ikusirik, partida oso estua espero zen eta baita gertatu ere: gogorra eta estua. Beraiek nahi baino akats gehiago egingo zituzten, izan ziren mordoxka-eta, baina halere, emozio eta kalitate handiko tanto asko jokatu zituzten, eta zaleen txalo zaparrada ugari eragin zuten.
Partidari hotz antxean ekin zioten Garmendia-Eizmendik, batik bat Garmendiak, eta sei-zazpi tanto atzetik ziren ohartzerako (13-6). Hemendik aurrera gauzak aldatzen hasi ziren, joko taktika aldatu zuten alegiarrak-eta: berau gehiago sartzen eta arriskatzen hasi zen, eta tantoak beren aldera erortzen hasi ziren. Mendizabal gehiago mugiarazten ari ziren orain, jokoan agintzen, zuloak irekitzen eta, batik bat txokoan, aukerak aprobetxatzen. Irati Otaegi bere aldetik oso ondo egiten ari zen bere lana, defentsan zein erasoan, baina ezin zion eman Mendizabali, Garmendiak Eizmendiri ematen zion laguntza guztia. Hala iritsi zen partidako lehen berdinketa: 24na. Hurrengo berdinketa 25nakoa izan zen: Mendizabalek txokoan airez goxo-goxo utziz amaitu zuen, lauak batera eta bestera ibili behar izan zuten tanto batean; pilotariak lurrean geratu ziren ikusleak ikaragarrizko txalo zaparrada eskaintzen zien bitartean. Gero etorri ziren 26nakoa eta 27nakoa. Bazirudien nekeak gehiago eragin behar ziola beteranoenari, Mendizabali. Baina hemen azaleratu zen, berriro, bere izaera irabazlea: ez zuten oparirik egin eta aurkariak arriskatzera behartu zituzten, zorte askorik gabe, eta txokoan airez goxo utzitako pilotakadarekin anoetarrak berak eman zion amaiera partidari:30 eta 27.
Emakume pala jokalarien arteko festa eta ikuskizun bikaina izan zen atzokoa, bertaratu ziren ikusleek gozamenez hartu zutena. Hurrengo urtera arte.