Larunbatean, hilaren 23an, Planetaren Ordua ospatuko da mundu osoan. Ingurumenaren aldeko mobilizaziorik handienetakoa da, eta besteak beste, natura gure bizi-euskarriaren sistema dela gogoraraztea, eta gizartea klima-aldaketaren arazoaz ohartaraztea da helburua. Ordubetez argiak itzaltzea da egitasmoaren funtsa, klima aldaketaren eta biodibertsitatearen galera geldiarazteko. Izan ere, 60 minutuk gutxi diruditen arren, mundu mailan bat eginez, ordu hori milaka orduko ekintza bihurtzen del azaldu dute.
Tolosako Udalak bat egingo du egitasmoarekin eta larunbatean, eraikin publikoetako argi apaingarriak itzaliko ditu, hala nola, Zerkausiko arkuak apaintzen dituzten argiak, udaletxekoak, kultur etxekoak, Musika Eskolakoak edo Euskaldun Berria zubikoak. Itzaliko diren argiak apaingarriak dira eta, horrenbestez, eraikin publiko horien barruko argiteria piztuta mantenduko da.
Udalak herritarrak animatu ditu egitasmoarekin bat egin eta ordubetez argiak itzaltzera, «klima aldaketaren galera geldiarazi eta gure natura eta planeta zaintzeko».