Berezia izan da, gaur, pentsiodunek Tolosako kaleetan egin duten manifestazioa; berezitasun modura, emakume pentsiodunak izan dira mobilizazioaren lehen lerroetan. Udaletxe atarian hasi eta bukatu dute; bidean, baina, bi geldialdi egin dituzte; lehena, Berdura Plazan; bigarrena, berriz, Emakumeen Plazan. Esaldi bana irakurri dute bakoitzean: "etxean geratu gabe, beharrezkoa da kaleak hartzea" eta "gure mugak aldatu direla onartzeak ez du esan nahi lehen mugarik ez genuenik; zerbait egiteko denbora gehiago izatea estrategia bat baino ez da, egiten jarraitzeko". Bigarren geldialdiaren ondoren, gainera, Zutik emakumeak kantua abestu dute.
Behin Plaza Zaharrara iritsitakoan, esaldi-sare moduko bat osatu dute, emakume artistek idatzitako hainbat aldarrirekin:
- "Zahartzeko eskubidea ukatzea, bizitzako lehentasunez gozatzeko azken aukerari uko egitea da".
- "Askotan, zahartzaroa gaixotasunarekin identifikatzen dugu, etapa hau zorigaitz modura hartuz, gaixo itxurak eginez babestu beharko bagina bezala".
- "Ez dugu atzera penatuta begiratu behar, eta ez dugu aurrera beldurtuta begiratu behar".
- "Sekula ez da berandu ezkutuko zaletasunetarako".
- "Zahartzaroa, erakartzen gaituzten gauza berrien aurkikuntza ere bada".
- "Zahartzea inbentarioa egitea da, eta geratzen zaizkigun aktiboak zentzuz administratzea".
- "Zahartzaroak duen gauza ona da bizitzea, eta nahi duzuna egitea".
Manifestazioari amaiera emateko, Amaia Agirre bertsolariak egindako bi bertso abestu dituzte, denek elkarrekin:
Emakumeen eguna
eskubideen aldarri
lan baldintza duin batzuk
nahi dituena oinarri
merezitako pentsio
ta ordain sari egarri
lepoa makurraraziz
injustizien uztarri
oro erantzi nahi dugu
ta iraultza iragarri
herri bat bihur ez dadin
fosiltzen uzten den harri
zaindu gaitezen norbera
bide emanez elkarri
ta zaintzaren erdigune
nork bere burua jarri
Zu ta ni gu gara baina,
zutabe zara ni gabe
zu bat eta ni bi baina
besteen zubi halare
ume eta helduen zaintza
beti gure kargu daude
heteropatriarkatu
gizarte baten ondare
egin zaitez betaurreko
more feministen jabe
burujabetza askean
atari eta sukalde
norbere burua maite
eta zaintzeko prest gaude
herri feminista more eta
libre baten alde
