Dantzan hasten dira Tolosako inauteriak, eta dantzan bukatzea izaten da inauterizaleen gogo bakarra. Sei egunetarako indarrak neurtzea, ordea, trebeenen esku izaten da, eta gaur goizean 300 bat dantzari iaio elkartu dira Tolosako kaleetan barrena.
Kriskitinak oparitu dizkiote inauteriari; kriskitinak eta kolorea, eguzkiaren laguntzaz. Gustura zeuden Udaberri dantza taldeko antolatzaileak, azken urteotan behin baino gehiagotan mugitu behar izan baitute gorputza, euritan. 2017a, baina, urte berezia dute, eta badirudi eguraldiak ere omenalditxoa egin nahi izan diola taldearen 60. urteurrenari.
Hartza, artzaina, txantxoak, pinotxo, txerrero, amona,... Inork ez du hutsik egin nahi izan, mozorro egunen bezperara.