Iraolarekin batera proiektuan parte hartu dute Oihan Vitoria, Jokin Uribeetxeberria eta Ander Bolibar debagoiendarrek, eta Kepa Matxain añorgarrak. Etxehuts film laburrak Lekeitioko Euskal Zine Bilerako sari nagusia irabazi du, larunbatean Ikusgarri zinema aretoan eginiko ekitaldian.
Jaialdiaren 36. aldian 54 lan lehiatu dira orotara, eta boskoteak eginiko laburrak amateur saileko film onenaren saria eskuratu du. Ordainsari gisa 1.100 euro eta antzarra jaso dituzte. Aurtengo epaimahaia zinemagintzako ondorengo profesionalek osatu dute: Mireia Gabilondo, Imanol Rayo, Patxo Telleria, Jabi Elortegi, Arantza Lauzirika Morea eta Natxo Rodriguez Arkaute.
Laugarren saria azkeneko urtean
Ez da aurreneko aldia Etxehuts film laburra saritzen dutela. Joan den apirilean Huhezinema Jaialdian aurkeztu zutenetik, hainbat lehiaketatan jaso ditu oroigarriak: Huhezineman (epaimahaiaren aipamen berezia), Beasaingo Film Laburren Lehiaketan (3. saria) eta duela hilabete ospaturiko Bergarako Film Laburren Jaialdian (1. saria).
Etxehuts filmaren protagonista Aritz da, etxe okupatu batean bizi den 25 urteko gaztea. Urteetan norbere bizitza proiektua aurrera eramateko oztopo ugarirekin topo egin du, baina badirudi okupa ideologian behin-betiko txokoa aurkitu duela. Lasai, gustura eta zoriontsu dago etxean, beste bi pertsonarekin elkarbizitzen hasi arte. Une horrez geroztik bere bizitzak ez du berdina izaten jarraituko.
'Etxehuts' filma garaile Lekeitioko 36. Euskal Zine Bileran
Mikel Iraola tolosarrak beste lau lagunekin egindako film laburrak beste sari bat jaso du, laugarrena dagoeneko.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!