Otsabio Kirol Elkarteak antolatutako Ezetz 4! mendi erronka amaierara iristear da. Hain zuzen, larunbatean, seigarren irteera egin zuten Zumaiara. Elkarteko kideek kontatu bezala, «egun zoragarria igaro genuen, primerako eguraldi izan genuen, ikuspegi paregabea eta konpainia ezin hobearekin». Herritar ugarik parte hartu zuten, eta irteera guztietan bezala, bi ibilbide izan zituzten aukeran; bata laburra eta bestea luzea.
Ibilbideak amaitu ostean, Zumaian elkartu ziren partaide guztiak eta otordua egin zuten bertako jatetxe batean. «Eguna bukatzeko mahaian elkartu, esperientziak partekatu eta konpainiaz disfrutatzea baino gauza hobeagorik ez dago», esan dute elkartetik.
Datorren hitzordua maiatzaren 18an izango dute eta egun horretan Otsabio eguna ere ospatuko dute Lizartzan. Informazio gehiago aurrerago zabaltzen joango direla jakinarazi dute.