Gisa honetako larrialdi baten aurrean lehen lerroan izatea tokatu zait lehen aldiz. Eta bada gertatutako guztian oso deigarria iruditu zaidan zerbait: une zailenetan elkar laguntzeko dagoen borondate eta erraztasuna.
Askotan errepikatu izan dut gustatuko litzaidakeela komunitate izaera indartu eta Tolosa elkar zaintzen duen herria izatea. Hitz potolo eta ederrak dirudite, baina azken egunotan ikusi da benetakoak ere badirela.
Kaltetutako bizilagunei nire begirunea azaltzeaz gain, eskerrak ere eman nahiko nizkieke, egoeraren tentsio eta zailtasunean, uneoro izan duten jarrera egoki eta ulerkorragatik. Ez da erraza halako egoera bati aurre egitea.
Nire aitortza ere bai, udal teknikari, arkitekto, zinegotzi, udaltzain, suhiltzaile, ertzain, ostatu eta laguntza eskaini duten gainerako herritarrei ere. Artatu, leku batetik bestera garraiatu, botikak erosi, lasaitu, informatu, hitz egin edo entzun. Alegia, modu batera ala bestera, lagundu. Talde lan horri esker, hiru ordu baino gutxiagoan bideratu zen egoera astearte gauean, eta asteazkenean egun osoan zehar jarraipena eman ondoren, familiak beren etxeetara itzuli ahal izan zuten.
Jarrera negatiboak azpimarratzen ohituagoak gauden garai honetan, jarrera positiboak nabarmentzea beharrezkoa dela uste dut. Eskerrik asko denoi.
Andu Martinez de Rituerto, Tolosako alkatea