17:00etan hasita, Irurako San Migel plazatik abiatu dira korrikalariak. Guztira, 5,1 kilometroko lasterketa osatu behar izan dute. Herriari hiru itzuli osatuz bete dituzte aipatu kilometroak.
Animoak ez dira falta izan ikusleen partetik, eta eguraldi txarra iragarrita bazegoen ere, zorteko izan dira irurarrak eguzkiak gozatu baitu gaurko arratsaldea.
Mutilen podiuma Aitor Etxeberriarekin batera, Jokin Bellidok eta Asier Mujikak osatu dute. Nesken hirukoa Maria Lasarekin batera, Itziar Ibarbiak eta Eguzkiñe Zabaletak borobildu dute. Beterano azkarrenek ere oroigarria jaso dute Irurako Udaleko ordezkarien eskutik. Honela, Luis Anjel Bazterra eta Elena Beristain izan dira gaurko beterano azkarrenak.
Ekitaldia ixteko, taldeko argazkia atera dute udaletxe berrituaren aurrean saridunek, eta ondoren, parte hartzaile guztien artean opari eta zozketak izan dira.