Ikaztegietako XXVI. Herri Krosa larunbatean izango da, hilaren 19an. 16:30ean helduen lasterketa hasiko da. Haurrek, 16:15ean hartuko dute irteera. Izena emateko aukera zabalik dago, herrikrosa.eus webgunean. Nagusiek 10 euro ordaindu beharko dituzte aurrez. Egunean bertan, inskripzioa 13 eurotan jarri dute, eta izena emateko mahaia 15:00etatik 16:00etara egongo da zabalik.
Ibilbideari dagokionez, Behobiakoaren erdia izango da, hau da, 10 kilometrokoa. Alegia aldera abiatuko dira korrikalariak lehenik, eta ondoren buelta hartu eta herriko zubira joango dira. Hortik, elizaren atzetik pasa eta berriro errepidera irtengo dira, Legorreta aldera joateko. Bertatik berriro Ikaztegieta aldera etorriko dira. Itzuli hori hiru aldiz egin beharko dute helduek. Haurrei dagokienez, zirkuitu laburragoa jarri diete antolatzaileek. Herriko bi biribilgune artean ibiliko dira korrika gaztetxoak.
Iaz 81 lagunek parte hartu zuten helduen lasterketan, eta Herrigintza Elkartetik zenbaki horretara iritsi nahi dute aurtengoan, eta ahal bada, gainditu. Parte hartzera jendea animatu nahi izan dute, eta ohiko sariez gain, aurten zozketarako materiala jarri dutela esan dute antolatzaileek. Lehen 100ek kamiseta ziur izango dute.