Berdintasunaren alorrean urratsak ematen jarraitzeko asmoz sortu dute taldea. «Kolektiboki aurrera egiteko elkargune bat izango da, gogoeta eginaz, esperientziak eta konplizitateak elkartrukatuz, ekintza desberdinak antolatuz, eta abar», adierazi dute.
Gizarte parekideago bat nahi dutela aldarrikatu dute, bai beraientzat, bai etorkizuneko berastegiarrentzat. «Horregatik, beharrezkoa ikusten dugu zurrunbilotik atera eta, hausnartzeko nahiz ekiteko, leku seguru bat izatea, ikusten ez dugunaz jabetzeko, ikusten eta bizitzen dugunaren aurrean pausoak emateko, eta zergatik ez, adin ezberdinetako emakumeen arteko sareak ere osatzeko».
Taldea irekia izango dela adierazi dute, eta nahi duen emakume orok izango du bere tokia. «Taldekide aktibo izan zaitezke edo antolatzen diren ekintzetan zein jardunaldietan parte hartzaile. Interesa baduzu, hurbildu guregana lasai, galdetu, parte hartu».