Hala, atez ateko bilketa sistema dagoen herrietan, organikoarekin bi aukera dituztela ere gogoratu du, konpostatzeko aukera ere badutelako. Landa eremuko herriak nabarmendu ditu Azkuek, horietan, urtearen erdialderako organiko osoa bertan kudeatzea lortuko dutela azpimarratuz: "19 herri ditugu eskualdean, eta gure apostua banakakoa nahiz auzokonpostarena izan da, organikorik gehiena bertan kudeatzeko". Datu orokorrei begiratuta, berriz, zabortegira bideratzen den hondakina %14 jeitsi dela adierazi du, eta "hori hein handi batean, konpostagailuei esker izan da".
Jexux Peñagarikano Ibarrako alkateak azaldu duenez, hondakin bilketa sistema berria udaberrirako martxan izango da Ibarran. Konpostagailuei dagokienez, guztira zazpi gune jarriko dituzte, eta 250 familiak konpostatuko dute herrian urte bukaerarako.
Iñaki Errazkin Foru Aldundiko Ingurumen Diputatuak Tolosaldeak eginiko lana eskertu du, eta horrelako lanak eta emaitzek Gipuzkoan ezagutu ditugun zabortegi kutxakorrak ixteko unea dela erakusten dutela esan du.
