Patxi Amantegi: "Derrigorrezko bosgarren edukiontziak bakarrik betetzen ditu baldintza guztiak"

Ikasturte berrian ere hondakinen gaiak talka sortzen jarraitzen du. Atzo, Tolosako Udalak batzarra deitu zuen, eta gaur, Tolosaldea Txukunek, bere erantzuna plazaratu du. Horrez gain, plataformako bozeramaileak, Patxi Amantegik, eskualdeko balantzea egiteko probestu du gaurko agerraldia.
Alde batetik, Tolosaldea Txukunek Idema enpresaren ikerketaz hitz egin du. Tolosako Udalak azterketa honen bigarren fasea asteartean aurkeztu zuen herritarren aurrean, Topic-en. Amantegik bi ondorio atera ditu ikerketatik: «Alde batetik, argi gelditu da derrigorrezko bosgarren edukiontziak bakarrik gainditzen dituela baldintza guztiak. Alderatutako sistema guztietan onena bezala agertzen da. Bestalde, atez atekoaren inguruko sistema bakar bat ere ez da ekonomikoki jasangarria».
Tolosaldea Txukuneko bozeramaileak beste bi irakurketa ere egin nahi izan ditu: «Idema-ren txostenak Tolosa aparte dagoen uharte bat bezala aztertzen du, kontuan izan gabe, hondakin bilketa eskualdean mankomunitate moduan egiten dela. Horrez gain, Tolosaldeko Mankomunitateak errekurtsoak optimizatzen dituela onartzen du ikerketak, batez ere herri txikienak mesedetuz».
Idema-ren ikerketaren datuak ere hizpide izan ditu Patxi Amantegik gaurkoan, «ordaindu duenaren aldeko makillajea» nabari dela esanaz: «Datu objektibo bezala ematen dira neurtzea zailak direnak, estimazio formula erabiliz; erabili diren karakterizazioak Gipuzkoako Foru Aldundiak eginak dira, Gipuzkoa Zero Zaborrek beraz eta jartzen den sistema jarrita ere, herritarren aurkakotasuna sortuko duela dio. Hori egia da, baina ez portzentaje berdinetan. Adibide bezala, Legazki aipa genezake. Bertan, bosgarren edukiontziaren alde %80 agertu zen». Horrez gain, Tolosaldea Txukuneko bozeramaileak CO2aren isurtzeak aipatu ditu. Kalkulu horiek zabortegiak kontuan hartuta egin direla esan du, eta Europako legediaren arabera, zabortegiak itxi egin behar direla gogoratu du.
Atez atekoaren aurka gogor hitz egin du Patxi Amantegik, eta herritarrengana ez iristearen arrazoia ez dela Bilduren komunikazio arazo bat izan, gizarteak hasieratik ikusi zuela atez atekoa «fartsa bat» zela esan du Amantegik.
Tolosaldea Txukunetik birziklatzearen alde daudela argi utzi nahi izan dute, eta herritarrak horretan jarraitzera gonbidatu dituzte: «Etxeetan hondakinak egoki aukeratzen joan, ondoren dagozkien edukiontzietan botatzeko». Etorkizun jasangarri batekin konpromisoa azaldu dute, eta jasangarritasun horrek ekonomikoa, ekologiakoa eta gizarte mailakoa izan behar duela aldarrikatu du Amantegik.
Tolosaldea Txukunen agerraldian EAJ eta PSE-EE alderdiko udal ordezkariak egon dira, besteak beste, Olatz Peon, Maria Angeles Lazkano eta Jose Ignazio Asensio. Plataformako bozeramaileak eskualdeko hainbat udal aipatu ditu, bai kritika egiteko eta baita zoriontzeko ere. Lehenik eta behin, Tolosako Udalari ausardia eskatu zion Amantegik, bizilagunentzat erabaki zuzenena hartzeko garaian. Horrez gain, Tolosaldeko Mankomunitatean duen pisu handia probestu dezala eskatu dio udalari Tolosaldea Txukuneko kideak: «Idema-ren txostena gainontzeko alkateei erakusteko eskatzen diogu, elkarrekin ondorio berdinetara iristeko. Ez dauka logikarik Ikaztegietako eta Ibarrako udalak atez atekoaren alde burugogor jarraitzeak, sistema garestiagoa eta eraginkortasun gabea dela demostratu denean».
Azkenik, Tolosako Udalari, Zero Zabor politikaren eta hondakin bilketa sistema arrazional baten arteko oreka bilatzea eskatu dio Amantegik. Bide horretan, Berrobiren eredua azpimarratu du Tolosaldea Txukuneko bozeramaileak: «Euren hondakin organikoa edukiontzien bidez gestionatzen dute. Bosgarren edukiontzia erabiltzen duen lehen Zero Zabor herria izan daiteke Berrobi. Tolosaldea Txukunetik ekimen hori txalotu nahi dugu».