EH Bilduk hiru ekimen aurkeztu ditu Gasteizko Legebiltzarrean, Tolosaldeko osasun arreta publikoaren gaia «sakonki jorratzeko», Osasun Sailak arreta emateko Inviza enpresarekin duen hitzarmena aztertu, eta horren balorazioa irakurri ondoren. Irratiko Solasaldiaren tartean izan da Rebeka Ubera legebiltzarkidea eta, besteren artean, Osasun sailak osasun sistema publikoak dituen baliabideak husteko eta zerbitzu publikoak desmantelatzeko duen jarrera agerian geratu dela esan du.
Ekimenei dagokionez, Tolosaldeko osasun arretaren gaia jorratzeko, batetik, Inviza enpresarekin hitzarmena sinatu aurretik, erabakia hartzeko Osakidetzak egin zituen azterketak eskatuko ditu EH Bilduk. Bestetik, Asuncion Klinikaren kudeaketarako aurreko hitzarmena ebaluatzeko txostena azaltzeko, kontratazio zuzendariaren agerraldia eskatuko du. Eta azkenik, osoko bilkuran, Osasun sailburuari bultzatu asmo duen osasun arreta publikoaz galdetuko dio.
