Lan mahaia bi helbururekin osatu nahi dute TOPAko kideek: "Duela gutxi arte genuen anbulatorioa berreskuratzeko, bere espezializate guztiekin, profesional nahikoarekin eta ekipamendu teknologiko egokiekin, eta, Asuncion klinika pribatua publiko egiteko eta berau kudeaketa publikodun eskualdeko ospitale bilakatzeko".
Sinadura bilketa egiteko larunbatero egongo dira Tolosako Trianguloa plazan, eta honekin batera, esku orriak banatuko dituzte, osasun arretaren inguruko kexak bilduko dituzte, eta materiala salduko dute babes ekonomikoa lortzeko. "Izan ere, oso gutxi lortuko genuen herritarren babesik gabe", esan dute.
Era berean, astean zehar osasun eskualdeko bost zentroetan esku orriak banatuko dituzte, hau da, Tolosan, Villabonan, Ibarran, Alegian eta Andoainen, eta hau guztia aldarrikatzeko giza katea ere antolatuko dute.
Hitzaldiak
Honetaz guztiaz gain, informazio hitzaldiak eskaintzeko prest azalduko dira eta horregatik interesa duten guztiei deia egin diete beraiekin harremanetan jartzeko.
Eskualde mailako manifestazio bat ere egingo dute ekainaren 14an, eta bertan ere lan mahaiaren eraketa defendatuko dute.
"Eskualdeko herritar guztiak gonbidatu nahi ditugu ekimen hauetan parte hartzera, izan ere utzi diguten bide bakarra baita kalera irtetea eta mobilizatzea", esan dute.
Bukatzeko, herritarrei TOPAn parte hartzeko gonbita luzatu diete, eta asteartero, 20:00etan, Tolosako Abastosen biltzen direla gogoratu. topakoordinatzaile@hotmail.com helbidera ere idatzi ahal dela nabarmendu dute.
