Euskalhaldun!

Irrikaz. Orduak aurrera egin ahala eta momentua iritsi ahala, urduritasunak erabateko zirrarari lekua egingo diolakoan. Orain arte egindako lanak behar bezalako emaitza izango duelakoan. Aurtengoan beste era batean biziko dudalakoan.

Eta Tolosaldean pasako den bi egunetan ere hainbat herritarrek ilusioz parte hartuko dutelakoan. Inguruko euskaltzaleek egiten baitute handi Korrika: bide ezberdinetatik euren ekarpena egin duten herritarrek, eragileek eta enpresek.

Tartean, eskualdean sortu diren batzordeetan gogoz aritu direnei nire eskerrik beroenak, Korrikaren besoak luzatu eta biderkatu dituztelako. AEKko kideei euren babes eta lanagatik, Korrikaz gain, urtea joan eta urtea etorri euskarazkoa den herria osatzeko egiten duten jardunagatik.

Kitto. Edo ez. Korrika igarota, lanean jarraitu beharko da lekukoak atzean utzitakoak atontzen. Eta baita aurrera begirakoak ere; egin beharreko bidea 10 egunekoa baino luzeagoa da. Lekukoa geratzearekin batera, ez ezazu euskararen alde jarduteko zeure ekina gelditu. Ahal duzu, ahaldun zara, euskahaldun!