HAZKA podkast feminista

Izango da urtebete proposamena jaso genuenetik. Feminismoaren ardatzean arituko zen podkast bat egiteko xaxatu gintuzten Atariako lagunek, eta, zalantzati egon baginen ere, osatu genuen mikrofono aurrean aritzeko taldea. 

Joana Aguado psikologoa gurekin izan dugu azken HAZKA saioan. Barrura begiratzea, kanpokoa ulertzeko. Edo, kanpokoak barruan nola eragiten digun ulertzeko?

Seigarren Hazka dugu gaurkoa, eta automobilismoari egin diogu tartea; Alazne Apalantzak bere bizipenak kontatu dizkigu. 

Zientziaren ardatzean dantzan aritu gara bosgarren Hazka podkastean, eta horretarako luxuzko gonbidatua izan dugu gurean: Izaskun Zeberio Etxetxipia mediku eta ikertzailea. Hematologiako minbizian aditua da, transplantean eta linfoman, eta mediku jarduna ikerkuntzarekin uztartzen du tolosarrak; pribilegiatu sentitzen da horregatik, ikerkuntza hutsaren bidea urratzea «ez baita samurra, bereziki emakumeontzat». 

Aintzane Artolaren ahotsa plazerez eta miresmenez hartu dugu laugarren saioan; bularreko minbizia ahalduntzearekin gurutzatu, eta gaixotu zenean falta izan zitzaion erreferente bilakatu da tolosarra. 

Eukene Larrartek errendimendutik bezainbeste zeharkatu nahi du txirrindularitza aktibismotik; bere jardunak sortzen dizkion azkurez eta horiei egin beharreko hazkaz aritu da gurekin.

Miren Egiguren bidaniarraren bizipenak izan dira intersekzionalitatearen atea zabaltzeko giltza, bigarren saioan. 

Mugimendu Feministak eskualdean egindako bidea marraztu digute, lehen saioan, Silvana Ostizak eta Gotzone Ijurkok; motz geratu zaigu grabazio-tartea.