Semeari bularra ematen ari zela koskor bat topatu, eta bizitzak ataka zail batean jarri zuen, duela urte batzuk. Bularreko minbiziak bularra kentzea ekarri zion, eta horren ondotik iritsi zen, lehengo itxura fisikoa berreskuratzeko presio etengabea.
Aintzane Artolak gaixo zegoenean falta izan zituen erreferente guztien lekua bete du azken urteotan egindako ibilbidearekin; bere bizipenak, bere hitzak, bere istorioa itsasargi bat da, bularreko minbizian eta gaixotasunaren ondorengoan galduta sentitzen diren emakume askorentzat.
Mandatu estetikoari uko egin, protesia zalantzan jarri, edertasuna definitzeko moduak birplanteatu; hori guztia eman dio feminismoak Artolari, gaixotasunari aurre egiteko. Hori, eta ahizpa sare goxo bat, zeina Izan Inurri proiektuan ehuntzen den.