Miren Egigurenek 46 urte eman zituen Venezuelan, komunitatea sortzen, saretzen, elikatzen; komunitatetik edaten, ikasten, arnasten. Komunitateari emana, eta emari hori bizimodu bilakatuta.
Badira bost bat urte eskualdera itzuli zela, baina Venezuelako ahaire haiek bailaran zabaltzen jarraitzen du, Tolosako Zuloaga auzoan, arratsaldero.
Leire Ibargurenek haren testigantza jaso berri du Petare. Miren Egigurenen puskak liburuan (2022, Txalaparta), eta aitzakia hori baliatu dugu, mundua beren txikitik aldatzen saiatzen direnen ahotsa HAZKAra ekartzeko; mundua nondik eta nola alda daitekeen ikusteko.
Horregatik jo ditugu, Miren Egigurenen ateaz gain, beste batzuk: Angela Davis, Lorea Agirre eta Idurre Eskisabelen puskek ere badute zeresana gure bigarren saioan, intersekzionalitatearen hariari helduta. Zapalkuntzak gurutzatzen direla onartzetik; menderakuntza guztiei maila berbera aitortzetik; hortik sortu daiteke beste mundu bat.
