Lerro hauek irakurtzen (entzuten) ari zareten gehientsuenok badakizuen bezala, aukera txiki bat (eta nik uste dut bakarra), duela zenbait hilabete sortu zen, Abeona Therapeutics-en eskutik, eta duela zenbait urtez geroztik Stop Sanfilippo egiten ari den lan handiari esker. Baina, orduko hartan, gainditu behar genuen lehen oztopo handia 3 milioi eurokoa zen. Aldapa izugarria tontorrera iritsi ahal izateko; zenbait gurasok, bizkarrean sanfilippodun seme-alabak hartuta, abiatu ginen mendi tontorrera, erlojuaren kontra. Bagenekien, ordea, aldapa horiei aurre egiteko, laguntza eskatu beharko geniola, gailurrerako bidea gure aldamenean egin nahi zuen edonori.
Hala ere, nik garai hartan, ez nuen hurbiletik pentsatzen ere, laguntza-eskaera hura gaur egun den honetan bihurtuko zenik: gailurrera bidean, ilundu aurretik, laguntzen digun jende-uholdea. Herriko jendea, bai, herriko jendea aldi baterako bere arazoak bazterrean utzi eta guri laguntzera gerturatzen dena. Hori da lagundu digun jendea eta haiei esker gainditu ahal izan dugu, lan ikaragarria eginez, denok elkarrekin, lehenengo aldapa handia: milioi bat euro!
Mila esker aldapan gora, tontorrera bidean, aldamenean laguntzen diguzuen guztioi. Jakin ezazue, mendi izugarri honen gailurrera bidean Oierri eta beste haurrei laguntzen jarraitu edo hasi nahi duzuen guzioi, betiko esker oneko izango garela. Haur hauek ezin dizuete esker onik hitzez adierazi, baina irribarre soil batekin eskertuko dizuete dena.
Gutun honekin, Oierren familiak bihotzez eskerrak eman nahi dizkie aurpegi, ahots, iritzi, ama, aita, haur, lagun, adiskide, enpresa, denda, sagardotegi, kirolari eta kirol-elkarte, udaletxe, prentsa, komunikabide, jatetxe, ikastola, taberna, ezezagun... guzti-guztiei. Eta Gipuzkoako gizarte osoari, eta bereziki Tolosaldekoari, Goierrikoari eta Nafarrokoari. Eta batez ere, Laskorain ikastolari, gure aldamenean zaudeten guraso guztiei eta zuri, Idoia.
Zuek gabe hau guztia ez zen posible izango. Espero dezagun denok elkarrekin tontorrera iritsiko garela.
Mila esker bihotzez
Kepa Iribarren, Oierren aita
Erlazionatuak
11.000 euro Stop Sanfilippo fundazioarentzat
2014 eka 27 Ibarra
%2021.01.02_tokikom_735x413.png)
Hogeiak bai, bi ordutik behera ez
2014 eka 14 Tolosa
Eskerrik asko!
2014 mai 06 Ibarra
Oier Iribarrenek zure laguntza behar du
2014 mar 27 Ibarra
Sanfilippori stop
2014 mar 30 Tolosaldea
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!