Bertsotan hastea falta da

Gipuzkoako Bertsolari Txapelketako final-zortzirenak gaur hasiko dira, Oñatin egingo den saioarekin, eta igandean Amasa-Villabonan izango da. Haritz Mujika, Beñat Iguaran, Iñigo Gorostarzu 'Etxorde', Unai Mendizabal eta Mikel Artola ariko dira, eta Oihana Iguaran final-laurdenetan sartuko da.

Gaur hasiko dira Gipuzkoako Bertsolari Txapelketako final-zortzirenetako saioak, Oñatin, 17:00etan. Igandean, berriz, Amasa-Villabonak hartuko du bigarren saioa. Bertsoaren errota bueltaka hastera doa, eta, herriz herri, bertsolari bakoitzak bere aleak utziko ditu. Udaberrian hasitako jardunaren ondoren, Tolosaldeko hiru bertsolari iritsi dira final-zortzirenetara: Haritz Mujika asteasuarra, Iñigo Gorostarzu Etxorde berastegiarra eta Unai Mendizabal zizurkildarra. Uda pasata, txapelketa hasteko zain izan dituzte, Beñat Iguaran amasarra eta Mikel Artola alegiarra. Koska bat gorago dago, duela lau urte finalera iritsi zen Oihana Iguaran amasarra. Final-laurdenetan sartuko da txapelketaren gurpilean.

Joan den larunbatean, ekitaldi txiki batekin aurkeztu zuten Gipuzkoako Bertsolari Txapelketa, Asteasuko plazan. Bertan elkartu ziren hainbat bertsolari, epaile, idazkari eta gai jartzaile. Txapelketak irauten duen bitartean entzungo den sintonia eta aldizkaria aurkezteko baliatu zuten goiza. Pello Errota izan zuten alboan. Asteasuk bere heriotzaren mendeurrena ospatu du urte guztian, eta aurkezpena izan zen ospakizun guztiei amaiera emateko ginga jarri ziena.

Don Inorrez taldeak txapelketarako sortu duen Errotaren martxa sintonia ezagutzera eman zuten. Imanol Ubedak sortu duen abestia, gaurtik hasi eta abendura bitarte, txapelketaren bertso errotak izango duen doinua izango da; areto, antzoki, frontoi edo kiroldegi guztietako urduritasun minutuak beteko dituena.

Berrogeita bi bertsolariren lehia

Lehen fasean berrogeita bi bertsolarik kantatuko dute. Seina bertsolariz osatutako zazpi talde izango dira, eta saio bakarrera jokatuko dute. Horietatik hogeita hamar pasatuko dira final-laurdenetara. Zain izango dituzte 2015eko txapelketan finalera sailkatu, eta aurtengoan izena eman duten sei bertsolariak: Iñaki Apalategi, Agin Laburu, Jon Maia, Alaia Martin, Oihana Iguaran eta Beñat Gaztelumendi. Seina bertsolariz osatutako bost talde lehiatuko dira. Saio bakoitzeko irabazlea zuzenean pasatuko da hurrengo fasera, eta puntu gehien eskuratzen dituzten beste hamahiru bertsolarirekin osatuko dira finalaurrekoak.

Finalaurrekoak final-laurdenetatik sailkatzen diren hemezortzi bertsolarirekin jokatuko dira. Kasu horretan, sei bertsolariz osatuta, hiru talde egingo dituzte. Finalaurreko bakoitzeko irabazlea zuzenean pasako da finalera, eta puntu gehien eskuratzen dituzten bost bertsolarirekin osatuko da, Donostiako Ilunben jokatuko den finaleko zortzikotea.

Finalaurrekoak azaroaren 17an, 24an eta abenduaren 1ean jokatuko dira, eta azken saioa Tolosako Usabal kiroldegian izango da. Final handia, berriz, abenduaren 14an izango da, Donostian.

Bertsolariez gain, eskualdeko beste sei pertsona ere buru-belarri ariko dira, bestelako lanetan. Gai jartzaile taldean Imanol Artola Felix, Iker Iriarte eta Ion Zaldua ariko dira. Artolak urriaren 5eko Lasarte-Oriako kanporaketan eta urriaren 7ko Azpeitikoan jarriko dizkie gaiak bertsolariei; Iriartek, Zumarraga-Urretxun, hilaren 28an, eta azaroaren 17an, Arrasaten aritu beharko du; eta Ion Zalduari egokitu zaizkio, azaroaren 2ko Azkoitiko saioa eta Donostiako finala. Horiez gain, txapelketak duen puntu garrantzitsuetako bat epaileen lana izan ohi da. Lan horiek egin beharko dituzte Zigor Leunda, Felix Irazustabarrena eta Mikel Beloki eskualdeko ordezkariek.

Gaurtik aurrera, bertsoaren eta puntuen festa hasiko da. Bertsolariek nor baino nor aritu beharko dute. Hitzak eta doinuak izango dituzte lagun. Sormena izango da protagonista, eta emari horren guztiaren saria txalo zaparrada izango du bertsolariak.

ESKUALDEKOEN SAIOAK

IRAILAK 14. OÑATI
17:00, Santa Ana antzokia.HARITZ MUJIKA. Felix Zubia, Aratz Igartzabal, Andoni Mujika, Amaia Iturriotz eta Maider Arregi.

IRAILAK 15. AMASA-VILLABONA
17:00, Gurea antzokia. BEÑAT IGUARAN, Oier Etxeberria, Iban Urdangarin, Iñigo Mantzisidor, Odei Lopez eta Maialen Akizu.

IRAILAK 22. ZUMAIA
17:00, Aita Mari zinema. IÑIGO GOROSTARZU, Ander Lizarralde, Gorka Maiz, Beñat Jauregi, Jokin Bergara eta Unai Muñoa.

IRAILAK 28. ZUMARRAGA-URRETXU
17:00, Zelai Arizti aretoa. UNAI MENDIZABAL, Nerea Elustondo, Eli Pagola, Mikel Tapia, Iñigo izagirre eta Iker Ormazabal.

URRIAK 5. LASARTE-ORIA
17:00, Manuel Lekuona Kultur Etxea. MIKEL ARTOLA, Iñaki Zelaia, Eneko Araiztegi, Aitor Salegi, Oier Aizpurua eta Unai Izagirre.

URRIAK 27. AZPEITIA
17:00, Soreasu Antzokia. OIHANA IGUARAN, Alaia Martin, eta puntuazioz sailkatuta beste lau.

Erlazionatuak

"Prest egon behar dugu ona zen gai bat kentzeko"

Amezketa

Gipuzkoako Bertsolari Txapelketak berriz ere errota martxan jarriko du, bainak hori posible izateko, besteak beste, gai jartzaile taldeak lanak egi...
"Ez da erraza, baina momenturen batean disfrutatu egin nahiko nuke"

Asteasu

Oporretatik etorri berri, oraindik ere txapelketarako txipa aldatzen aritu da Haritz Mujika. Bertsolarientzat eta gipuzkoarrentzat pisu berezia due...
"Orain arte oso lasai egon naiz, baina aste honetan barruak mugitu zaizkit"

Amasa-Villabona

Igandean sartuko da txapelketan, Beñat Iguaran amasarra. «Kezka pixka bat badut. Beste batzuk dagoeneko txapelketan aritu dira, eta ni...
"Gogotsu nago berriz hasteko, eta ea eguna lehenbailehen iristen den"

Berastegi

Zalantzak izan zituen txapelketan izena ematearekin, Iñigo Gorostarzu Etxorde berastegiarrak, eta aurrera egitea lortu du, final-zortzi...
"Plazan dudan bertsokera txapelketara eramatea izango da nire helburua"

Zizurkil

Hasteko, gogotsu dagoela aitortu du Unai Mendizabal zizurkildarrak. Bigarren txapelketa du, eta hilaren 28an abestu beharko du. 
"Emaitzari asko begiratu gabe, ea saio on bat egiten dudan"

Alegia

Txapelketaren aurkezpenak beldur pixka bat sortu dio Mikel Artola alegiarrari. Gerturatzen ari den heinean erreparoa ematen diola kontatu du. Prest...
"Bertsotan oso-oso ondo egin beharko da aurten finalera sartzeko"

Amasa-Villabona

Distantziatik bizi izan du orain arteko txapelketa, Oihana Iguaran amasarrak. Hirugarren aldiz parte hartuko du eta final-laurdenetan sartuko da. &...

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!