"Orain arte oso lasai egon naiz, baina aste honetan barruak mugitu zaizkit"

Prestaketari buruz galdetzean, udaberritik zerbait aritu dela dio: «Besteak maiatzetik aritu direnean, gai jartzera askotan joaten nintzen, eta kantatu ere egiten nuen batzuetan. Beti gero egiteko horretan, uda ere kanpoan pasatu dut, eta oraintxe hementxe nabil, aztarrika. Besteetan baino gutxiago, esango nuke, baina dagoena dago. Ikusiko dugu ea nahikoa izan den».

Txapelketako lehen saioa, eta herrian bertan egokitu zaio: «Txapelketan esan izan balidate non ez nuen kantatu nahi, herrian esango nuen. Saio ona eginez gero, ondo herrian kantatzearekin. Tentsio gehiago izango dudala iruditzen zait, eta jende ezagun gehiago egongo dela ere bai. Ondo eginez gero, ondo, baina, bestela, errua zerbaiti bota beharko diogu».

Umorezko ariketak nabarmendu ditu: «Egunaren arabera izango da. Denean saiatuko gara, eta ea non asmatzen dugun». Laugarren txapelketa duela esanda, asko direla iruditzen zaio: «Lehen biak pixka bat galduta dauzkat, ordea. Ez daukat lau txapelketa pasa ditudanaren sentsaziorik. Orain arte oso-oso lasai egon naiz, baina aste honetan barruak mugitu zaizkit».

Bere buruari jarri dion helburuaz galdetuta: «Egin dudan prestaketarekin ez nago helburu asko jartzeko ere. Lehen fase hau pasatu nahiko nuke, eta, pasatuz gero, finalaurrekoetara ere iritsi nahiko nuke, azkenekoan iritsi nintzelako. Baina ez dakit neure buruari helburu bat jartzeko obligaziorik edo badudan. Kalean geratzen banaiz, pena hartuko dut».

Txapelaz ez du asko hitz egin: «Betikoak izango dira faborito, eta ez dut uste ezusteko handirik izango denik».