"Gogotsu nago berriz hasteko, eta ea eguna lehenbailehen iristen den"

Zalantzak izan zituen txapelketan izena ematearekin, Iñigo Gorostarzu Etxorde berastegiarrak, eta aurrera egitea lortu du, final-zortzirenetara sailkatuz. Hilaren 22an egokitu zaio berriz ere kantatzea, Zumaian: «Udan ez gara geldirik egon, eta gogotsu nago berriz hasteko, eta ea eguna lehenbailehen iristen den. Egia esan, azken aldia luze samar ari zait egiten».

Laugarren txapelketa du honakoa: «Urduritasuna norberak bere buruari jartzen dion presioarekin lotuta egoten da, eta beti izaten dugu helburutxoren bat jarrita. Presio hori hor egoten denez, urduritasuna ere beti hor ibiltzen da. Baina, hasieratik hona, urte horietan guztietan, asko ikasi dudala esango nuke plazan egoten, eta plaza aurreko minutu horiek pasatzen. Uste dut tenple onean joango naizela».

Ariketei buruz galdetuta, «betidanik» ofizioetan erosoen sentitu izan dela dio: «Gure bertsokera normalena hori izaten da; elkarri entzun eta elkarrekin elkarrizketa bat sortzen saiatzen gara. Bakarkakoetarako prestatu arren, ofizioetan nago erosoen».

Helburuak aipatzen hasita: «Nirea ematea behintzat bai, eta saio oso bat egitea nahiko nuke. Gu, elkarrekin gabiltzanok, maila antzekoan gabiltza, batzuk gorago edo besteak beheraxeago, eta gure mailarekin asmatuz gero behintzat, uste dut gutako edozein pasatu daitekeela hurrengo fasera».

Txapela janzteko dituen faboritoez ere aritu da: «Lehen ere puntan dabiltzan horiek izango dira. Nik uste dut ez dagoela sorpresa emango duen inor. Orain dela lau urte finalean egon zen edozeinek txapela jantzita ere, uste dut ez litzatekeela ezustekoa izango. Lehen erakutsi zutelako, eta azken lau urte hauetan ere erakusten aritu direlako».

Erlazionatuak

Bertsotan hastea falta da

Tolosaldea

Gipuzkoako Bertsolari Txapelketako final-zortzirenak gaur hasiko dira, Oñatin egingo den saioarekin, eta igandean Amasa-Villabonan izango da...

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!