Garikoitz Etxeberria presoak gose greba mugagabea hasi du

Garikoitz Etxeberria preso lizartzarra gose greba mugagabean dago, atzotik aurrera. Sevilla II espetxean daukate Etxeberria, eta bertako bizi baldintzak salatzeko, eta oinarrizko eskubideen defentsan, baraualdi mugagabea hasi du, beste hamar euskal presorekin batera. Gose grebaren arrazoiak beheko gutunean azaldu dituzte, eta herritarrei babesa eta elkartasuna eskatu dizkiete, «guztiok bat eginez lortuko baitugu».
Gose grebaren lehen egunean, atzo, Lizartzan herri batzarra egin zuten. Bertan aurrera begira egin beharreko urratsak zehaztu zituzten, Etxeberriari elkartasuna azaltzeko asmoz.
Frantziako poliziak 2007. urtean atxilotu zuten Garikoitz Etxeberria lizartzarra, Azkainen (Lapurdi). ETAko kidea izatea egotzita, Espainiaratua izan zen lizartzarra. Soto del Real (Madrid), A Lama (Galizia) eta Sevilla II (Andaluzia) espetxeak ezagutu ditu Etxeberriak. Azken honetara 2011. urtean eraman zuten, eta orduz geroztik, isolamendu egoeran daukate bertan.