Gose greba mugagabea

Garikoitz Etxeberriari babesa ematera deitu dituzte herritarrak

Senide, lagun eta herritar ugarik Etxeberriaren egoera salatu dute. I.TERRADILLOS
Espetxean pairatzen duten «politika zitalaren eraginez» sortutako egoera salatu asmoz, Sevillako IIko espetxean aurkitzen diren hamaika euskal presok gose greba mugagabeari ekin zioten iragan urriaren 28an. Tartean da Lizartzako Garikoitz Etxeberria.

Bere senideek, lagunek eta herrikideek bizi duen egoera salatu dute, eta ostiralean Sevillako espetxerantz abiatuko den elkartasun autobusean parte hartzera gonbidatu dituzte herritarrak, lizartzarrari «babesa eta indarra emateko».
15 egun daramatza lizartzarrak gose greban, eta zazpi kilo inguru galdu ditu. Etxeberriaren gertukoek esan dutenez, «une gogor hauetan gure elkartasuna jasotzea ezinbestekoa da». Hori dela eta, mobilizazioetan parte hartzera, espetxeko zuzendaritzari zuzendutako eskutitzak bidaltzera eta elkartasun autobusean izen ematera bultzatu nahi dituzte herritarrak.
Bestalde, sendiak jakitera eman duenez, presoen abokatuak, beraiekin egoteaz gain, espetxe zaintzako epailearekin izan da, eta presoek aldarrikatzen dituzten puntuak igorri dizkio, espetxe zuzendariari helarazi diezaizkion. Aste honetan izango da abokatua berriro espetxe zaintzako epailearekin, eta emango dituen berrien zain dago sendia.
Etxeberriaren gertukoek adierazi dutenez, duela lau urte eraman zituzten «dispertsioa helburu» lehen euskal presoak espetxe horretara: «Harrez gero isolamendu egoeran aurkitzen dira; euren patioa 20 metro karratukoa da, eta goikaldea sare batez itxia dute, argi naturalik sartzen ez delarik». Bestalde, tentsioa areagotzea sortzen duten egoerak maiz jazotzen direla salatu dute: «Egunero lau ordurako patiora ateratzeko garaian detektoretik igaro beharra izaten dute, eta txandaren arabera, barrabilak eta zakila ukitzera ere iritsi dira; horrek giroa txartzea eta tentsio egoera sortzea eragin dezake, berehala 72. artikulua aplikatuz presoei, eta zigor bezala, 48 orduz zigor ziegara bidaliz».
Horrez gain, hala derrigortuta egon arren, sendagilea ez zaiela astero pasatzen eta irain eta mehatxuak jasan behar izaten dituztela gehitu dute.

Erlazionatuak

S.O.S. mezua bidali dute Sevilla II espetxean dauden euskal presoen senide eta lagunek

Lizartza

Lizartzan manifestazioa egin dute, Sevilla II espetxean dauden euskal presoen eskubideak errespetatu daitezen eskatuz eta hauei elkartasuna adieraz...
Garikoitz Etxeberriak gose greba utzi du

Lizartza

Lizartzan manifestazioa egingo dute igandean, 18:30ean, plazatik abiatuta. Sevilla II espetxean dauden presoen oinarrizko bizi baldintzen alde.
Iritsi da elkartasuna Sevilla II espetxera

Lizartza

Ia 80 lagunek egin zuten elkarretaratzea larunbatean Espainiako Sevilla II kartzelaren kanpoaldean. Bi orduz irrintziak, txalaparta doinuak eta bes...
Nagore Esnaola: «Espetxe barruan dagoen beste espetxe bat da isolamendu egoera»

Lizartza

Zortzi kilo galdu ditu Garikoitz Etxeberria euskal presoak. Hemezortzi egun daramatza gose greba mugagabean lizartzarrak. Sevilla II espetxean daud...
Sevillako Euskal Preso Politikoen gutuna

Lizartza

Garikoitz Etxeberria preso lizartzarrak gutuna bidali du Sevillako espetxetik, hamabi kiderekin batera. Bertan, gose greba mugagabea zergatik hasi ...
Garikoitz Etxeberria presoak gose greba mugagabea hasi du

Lizartza

Lizartzarra Sevillako espetxean dago, eta baraualdian beste hamar kiderekin batera jarri da.

Tolosaldeko albisteak euskaraz, libre eta kalitatez jasotzea nahi duzu?

Horretarako zure babesa ezinbestekoa zaigu. Egin zaitez Atarikide!


EGIN ATARIKIDE!