Hitzordu berezia zuten gaur iluntzean Ibarran. Kilometroetako bideoklipa aurkeztu dute herriko elizan, herritarren aurrean. Aurkezpenean azaldu bezala, "herritik herrira, bertatik bertara" egindako bideoklipa da, "zero kilometro". Izan ere, lanketa horretan parte hartu duten guztiak dira bertakoak. Musika sortzen Enrikko Rubiños Rezola aritu da eta hitzak Maider Eraunzetamurgil Elustondo eta Ane Zubia Aranaldek jarri dizkiote. Ahotsa jarri diona, abeslaria, Eneritz Jauregi Lopetegi izan da eta ondoan izan du Unai Artola Eguren baxuarekin, Saioa Ugowe Balza teklatuan, Ander Zubillaga Artano gitarrarekin, Rubiños bera baterian, Jon Garmendia Anfurrutia albokarekin, eta Rubiños eta Garmendia txalaparta jotzen.
Grabazio eta nahasketak Bonberenea estudioan egin dituzte, Karlos Osinaga Txap-ekin. Eta bideoklipari dagokionean, produkzioaz eta edizioaz Arri Studioa arduratu da eta koreografiaz Alurr dantza taldea. Zeinu hizkuntza ere ageri da bideoklipean eta Julia Rodriguez Rojok, Maddi Ibarburu Romonk eta Aransgi elkarteak hartu dute horretarako ardura. Maskota moduan txorimalo bat ageri da eta bere sorkuntza Aloña Peñagarikano Mujikak egin du eta mugimendu artistikoa Nagore Leon Plazak eman dio, eta Uxue Murua Renobalesek gorpuztu du.
