Euskaldunok janaren bueltan elkartzeko ohitura dugu, eta Kilometroek ere horren bueltan elkartzeko aukera ematen dute. Plaza edo gune ezberdinak bazuen bere gastronomiaren txokoa, eta aukera ezberdinak izan dira aukeratzeko. Edo batetik bestera dastatuz tripa betetzeko.
Goiza poliki-poliki hasi da, eta hamaiketakoko txorizo pintxoek ogitartekoei eman die erreleboa. Plazan, Ibarrako piperra izan da protagonista, eta zaleek modu ezberdinetara jan ahal izan dute piperra.
Ez da ezer faltatu Ibarran jateko. Gustukoa aurkitzeko aukera izan da, batean edo bestean. Arrain parrila, Irribarra entsalada, ogitartekoak, eusko label pintxoak, piper dastaketa, kantu bazkaria, herri bazkaria, taloak,... Gosea asetzeko adina.
Zutik edo eserita. Aulkian edo lurrean. Adineko, haur edo gazte. Lagun artean edo familian. Guztiek jan dute Ibarran. Edozein garai eta edozein txoko izan da tripari plazer txikiak emateko gune.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!
