Ozaitak egunaren helburua azaldu du Ataria Irratian, eguerdian: "Jendea mugimenduan eta parte hartzen egotea nahi genuen. Gunez gune ibiltzea da proposamena, aukera desberdinak daudelako bakoitzean".
Erronkako gazteak, adibidez, horretan dabiltza. Gunez gune, erronka desberdinak eginaz, ikastola ezberdinetako 300 gaztetxo elkartu dira.
Baso magikoaren inguruan ere hitz egin du koordinatzaileak, "arrakasta handia" izaten ari dela esateko. Jolas egiteko eremuak, ipuin kontalariak, artistak... denek dute Kilometro hauetan euren oholtza.
Eredu aldaketaren inguruan galdetuta, ondorengoa adierazi du Ozaitak: "Orain arte oholtzak, musikak eta txosnak presentzia handia zuen. Ez diogu horri garrantzia kendu nahi, baina beste eremuetara zabaldu eta beste gauza batzuei ere garrantzia eman nahi izan diegu. Finean, urte guztiko ekimenak egun bakarrean bildu nahi izan ditugu". Teoria praktikara eramatea tokatu zaie ibartarrei, eredu aldaketarekin, "lan handia izan da, baina polita ere bai", esan du Kilometroak 2022ko koordinatzaileak.