Milimetroak festak Euskal Herri osoko gazteak bildu ditu Ibarran. Apirila amaieran Oreretan ospatu zituzten, eta gaurkoan Tolosaldeko festak Ibarra hartu du. Denera hamar ikastolatako 400 ikasle elkartu dira, LH6koak denak. Kilometroek Tolosaldeko beste ikastoletako ikasleekin harremana sustatzea dute helburu, baina, horiez gain, beste lurraldeetan ikastolen festa antolatzen dutenak ere bertan izan dira, besteak beste, Ibilaldia, Nafarroa Oinez, Araba Euskaraz eta Herri Urrats antolatzen aritu edo ari direnak.
Eskualdetik, Zubimusu, Irurako Ikastola, Anoetako Herri Ikastola, Laskorain eta Inmakulada ikastetxeak hartu dute parte. Arabatik, Argantzon eta Lautada Ikastolakoak etorri dira, Bizkaiatik Abusu Ikastolakoak, Nafarroatik Tafallako Ikastolakoak eta Baxenabarretik Manex Erdozaintzi Etxart kolegiokoak.
Hori horrela, goiza jolasean pasa dute. Hainbat taldetan banatu eta hamar joko egin behar izan dituzte. Horretarako, ezinbestekoa izan dute elkarlana, elkarri entzutea eta elkar ezagutzea. Behin jolasean harremanak eginda, elkarrekin bazkaldu dute, eta bazkalostean flashmob-a egin dute herriko plazan. Uzturpe Ikastolako hainbat ikasle oholtzan jarri dira, eta gainerakoek haien erritmoan egin dute dantza.
Euskal Herria mapetan erakustetik, errealitatean bizitzeko ekimen polita dela esan du Josu Ozaita Kilometroetako koordinatzaileak. "Ikasleen arteko harremanak bultzatzea dugu helburu, euskal hizketa desberdinak nahastea eta Euskal Herria aldarrikatzea".
