Ostiral honetan, Kilometroen egitarauaren barruan, Bertso afaria x7 ekimena dira ospatzekoak. Zazpi bertso afari antolatu dituzte aldi berean: hiru Ibarran, beste hiru Uzturpe ikastolako ikasle batzuen herrietan (Belauntza, Leaburu eta Gaztelu), eta azkena Oreretan. Saio bakoitzean bina bertsolari arituko dira. Oraindik ez dira sarrerak agortu eta Kilometroak.eus helbidean eros daitezke, 30 euroren truke.
Afariak 20:30etatik aurrera izango dira, baina aurrez, 19:00etan, Ibarrako San Bartolome plazan elkartuko dira hamalau bertsolariak eta lehen agurra bertan eskainiko dute, ondoren bakoitzak bere elkarteko bidea hartzeko.
Bertako elikagaiei eta gastronomiari emango diote garrantzia afarian. Honako menua prestatu dute: gilda, Ibarrako txistorra berdea, Irribarra entsalada, Lumagorri oilasko izterra saltsa berezian eta Izaskungo Bizkaietxe gazta eta sagar dultzea.
Ibarrako Xepla elkartean, Jon Maia eta Maialen Akizu arituko dira kantuan; Deportiban Onintza Enbeita eta Anjel Mari Peñagarikano; Sendi Ekintzan Nerea Ibarzabal eta Beñat Gaztelumendi; Belauntzan Andoni Egaña eta Ane Zuazubiskar, Leaburun Iker Zubeldia eta Nerea Elustondo; Gaztelun Oihana Iguaran eta Sebastian Lizaso; eta azkenik, Oreretako ikastolako baserrian Haritz Mujika eta Amaia Agirre.