Nekane Artola Labordeta Kilometroak Kultur Elkarteko lehendakariak, Amaia Lasa Muñagorri Uzturpe ikastolako lehendakariak eta Iban Urdapilleta Alkizalete Ataria-ko kudeatzaileak sinatu dute lankidetza hitzarmena. Besteak beste, Kilometroak jaiaren barruan antolatzen diren ekitaldien jarraipen berezia egitea adostu dute.
Ataria eskualdeko hedabidea denez, Tolosaldean gertatzen denaren berri euskaraz ematea du helburu. Bide horretan, 2022ko Kilometroak Ibarran izango denez, sustapena egiteko hiru aldeak elkarlanean ariko dira. Urte guztian zehar euskarri ezberdinetan egingo du zabalpena: irratian, papereko edizioan eta Ataria.eus webgunean. Gai honen inguruan sortutako informazio guztia atal berezi honetan bilduko da.