Ez da lehen aldia Ibarrak Kilometroak festa bat antolatzeko ardura duela, baina oraingoan desberdina izango da, herrikoiagoa izango da. Izan ere, 1998. urtean Tolosa eta Anoetarekin batera izan zuen zeregin hori, eta oraingoan bakarrik egin beharko du. «Ibarrak badu bereizgarri bat eta da herriko ikastetxe bakarra dela Uzturpe ikastola eta herritarrek atxikimendu handia dute. 2022ko KMK herriko festa izango da eta eragileekin eta herritarrekin batera egingo dugu», esan du Josu Ozaita ekimeneko koordinatzaileak.
Uzturpek asteburuan jasoko du lekukoa; igandean ospatuko dute aurtengo Kilometroak festa Beasain, Lazkao eta Ordiziak. Lanean hasiak dira jada, hala ere; ostiralean pintxo tertulia batekin bota zuten txupinazoa eta lanez eta ilusioz betetako urteari eman zioten hasiera. «Pintxo tertulia KMK urtea hasteko lehen ekitaldia izan da, eta asmoa izan da herritarren artean forma ematea urte berezi honi, eta irudikatzea nolako urtea izatea nahi dugun. 2022ko urriaren 2ko egunari lotutako ideia batzuk bildu nahi izan ditugu ere».
Ikastolako irakasleak eta irakasle ohiak, ikasle eta ikasle ohiak, eta gurasoak bildu ziren plazako aterpean, eta elkarmotibatzeko aukera izan zutela esan du Ozaitak. «Ikastolan sartu naizenetik konturatu naiz gogotsu daudela, jende gazte mordo bat dago, eta oso motibagarria izaten ari da».
Eredu berria
Urte batzuk pasa dira Kilometroetako arduradunek eredu berri baten inguruan hitz egiten hasi zirela, baina pandemia medio, ez da erabateko jauzia eman oraindik. Ozaitak esan du Ibarrakoa erabakigarria izango dela zentzu horretan, «eredu berriaren inguruan ari gara lanean eta praktikara eramango den lehen aldia izango da Ibarrakoa. Guk erabaki behar dugu hala ere, zein forma eman nahi diogun eta horretarako guztion ekarpenak dira garrantzitsuak».
Urteko ekitaldiak egongo direla aurreratu du eta urriaren 2an bertan ikastola zer den islatzen saiatuko direla, bestelako festa bat eginez. «Urriaren 2a biltzeko eguna izango da, baina arreta kalitatean jarri nahi dugu. Egun berezia izatea nahi dugu eta guztion artean egin nahi dugu».