Lizartzako guraso elkarteko kideak iragan apirilaren 19an bildu ziren Eusko Jaurlaritzako hezkuntza sailarekin, eskola berria eraikitzeaz hitz egitera. Bilera hartan jaurlaritzak adierazi zien 2017 urteko aurrekontuetan onartuta dagoela Lizartzan eskola berria eraikitzea, eta 1,5 milioi euro aurreikusi dituztela proiektua egiteko. Gurasoek ez dute erabateko poztasunez hartu berria, «ez dagoelako erabateko ziurtasuna eskola berria egingo dela, oraindik hiru urte geratzen baitira data horretarako». Horregatik, bitartean oinarrizko aldaketa batzuk emateko eskatu zioten Eusko Jaurlaritzari, eta neurri horiek hilabeteko epean erabakitzea adostu zuten. Bada, oinarrizko eskaera horietako bat aurrera eramatea onartu du jaurlaritzak, eta datorren ikasturtean aurre fabrikaturiko etxola berria izango dute eskolako haurrek.