Eskualdeko liburutegietatik egindako proposamenei arreta jarri diegu gaurko irratsaioan. Liburutegi Zerbitzuak eta Galtzagorri elkarteak Booktuberboom lehiaketa jarri dute martxan eta Intza Alkainek hitz egin digu 14 eta 18 urte arteko gazteei bideratuta lehiaketaz.
Bestalde, Galtzagorritik aste honetan egin diguten beste proposamen bati egin diogu azpimarra. Liburuaren astearen barruan Alizia lurralde miresgarrian liburuan oinarritutako areto literarioa jarri dute Atxulondo kultur etxean. Lur Korta gidariak aurkeztu digu ostiralera arte zabalik izango den aretoa.
Josu Artutxa lankideak Karlos Linazasororekin hitz egin du aste honetako elkarrizketa nagusian. Idazle tolosarrak Buzón de sugerencias aforismo liburua argitaratu berri du.
Galtzaundi euskara taldeak martxan duen irakurle taldearen hurrengo hitzorduari ere aipatu dugu. Azaroaren 26an, Idurre Eskisabelek eta Lorea Agirrek idatzitako Trikua esnatu da saiakeraz arituko dira. Yurre Ugarte irakurle taldearen dinamizatzaileak hitz egin digu liburuaz.