Iragarria zegoen Ibarrako Uzturpe ikastolak antolatuko zuela Kilometroak jaia 2021ean, baina igandean ez du lekukorik hartuko. «Osasun egoerak sortzen duen ziurgabetasuna ikusita, ikastola bakar batek ezin du asumitu jaiaren antolakuntza, orduan, modu kolektiboan, ikastola guztien artean egingo zaio aurre egoerari», azpimarratu du Mikel Egibar Kilometroak jaiaren koordinatzaileak.
Zizurkilgo Joxe Arregi plazan igandean egingo da lekuko emate ekitaldia. «Nola irudikatu dugun? Gustatuko litzaiguke Gipuzkoako ikastola guztiei ematea, baina egoera ikusita, ordezkari bakar bati eskaini beharko zaio eta hark jasoko du ikastola guztien izenean», esan du Egibarrek.
Datorren urtean Gipuzkoako Ikastolen Elkarteak «Kilometroak kolektibo bat» du buruan. Ez du ikastola bakar batek hartuko antolakuntza eta ikastola guztien artean prestatuko da Gipuzkoako ikastolen jaia izan nahi duen ekimena. «Eredu berriaren barruan egiten diren jaialdi txikiak izango dira herrietan eta azken jaialdi bat ospatuko dugu denok elkarrekin», gaineratu du Kilometroak jaiaren koordinatzaileak.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
