Aurtengo Kilometroetako jaiari lotutako dendaren ateak zabaldu dituzte Villabonako Altzin auzoko 3. zenbakian. Amasa-Villabona eta Zizurkilgo Zubimusu ikastolako gaztetxoek, Kristina Solanorekin batera egindako trikiti eta pandero kalejira txiki batek eman zion hasiera inaugurazioari. Ondoren, egokitu eta txukundu duten lokala ezagutarazteaz gain, 2020ko Kilometroetako materiala ere aurkeztu zuten eta azkenik, merendola txiki batekin eman zioten amaiera inaugurazioari.
Bertan aurki dezakezun eskaintza zabala da: kamisetak, kirol-jertseak, zirak, biserak, poltsak, txapelak, buffak, botilak, aterkiak, askari-zorroak, giltzatakoak edota eskumuturrekoak, besteak beste.
Dendaren ordutegia honako hau izango da: Astelehenetik ostiralera 17:00 - 20:00 eta larunbatetan 10:00 - 13:00.