KMK20: Logoa eta leloa

Kilometroak 2020 auzolan handi bat izango da, eta, beraz, hasiera-hasieratik ikastolako komunitateak jaiaren diseinuan parte hartu du; bai eta logoa eta leloa sortzeko prozesuan ere.

Leloarekin hasi genuen prozesua. Lehenik, apirilean egindako pintxo-tertulia ekimenean, gure inguruak burura ekartzen dizkiguten ideiak oinarri hartuta, ideia-jasa bat egin genuen; ondoren, guraso, langile zein ikasleek galdetegi bidez beste zenbait aukera helarazi zizkiguten, eta, azkenik, bailarako zenbait bertsolariren laguntzaz, azken lelo-sorta osatu genuen. Hain zuzen ere, lelo horietako bat aukeratu dugu guztion artean, bozketa bidez.

Leloak hiru zati ditu:

  • Lehenak, “korri”, aurrerantz emandako pausoei egiten die erreferentzia, pilota jaurti aurreko uneari, iraganean egindako bideari.
  • Bigarrenak, “punpa”, prestaketa-garaia irudikatzen du, sakearen unea da. Oraina.
  • Hirugarren zatia etorkizuna da, “ttak”, sakea egin, pilotari gogor eman eta aurrera egiteko garaia da.

Logoa sortzeko, berriz, Haur Hezkuntzara jo genuen. Kilometroak 2020 jaiaren komunikazio-taldeak sortutako “Pilotaren itzala, euskararen taupada” ipuina kontatu genien haurrei, eta ipuinari buruzko marrazki bat egiteko eskatu. Marrazki horietako bat oinarri hartuta, diseinatzaile batek jaiaren logoa sortu zuen.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!